يوميات تعليمنا المنزلي

منشور قديم عالفيس بوك  يعاد نشره للإفادة 
عمر بنتي كان 3 سنوات تقريبا

..........

عايزة أكلمكم انهاردة عن حاجة جميلة جدا

من ساعة ما بدأت أستخدمها في تعليمنا وهي مسهلة عليا كتير 

وكمان ساعدتني إني أثبت روتين صباحي لينا 

ونستمر في تعلمنا مهما كان اليوم مضغوط أو مالناش طاقة 

الحاجة دي هي 

Morning homeschool basket 

هي وسيلة بديلة لل circle time والبعض بيشوفها شكل من أشكالها بيستخدمها المعلمين منزليا في الغرب كوسيلة لإدخال الطفل لمود الدرس وبداية وقت التعلم 

عبارة عن سلة بنضع فيها مجموعة من الأنشطة أو المواد الدراسية المتنوعة من إنشطة مهارية أو كتابية أو علمية أو حتي مسموعة نقوم بممارستها بشكل يومي في بداية اليوم الدراسي مع الطفل فبيساعدنا علي تحقيق فوائد منها:

1. تثبيت روتين يومي لليوم للدراسي  .. 

٢. بيمهد للطفل هيتعلم عن إيه ويثير شغفه لما يطلع علي محتوي السلة 

٣. ضمان قدر ما من التعلم يوميا يضمن لنا الاستمرارية حتي في الأيام المضغوطة والمشغولة 

محتوي السلة مش ثابت بيختلف من أسرة لأسرة بس كأمثلة للأنشطة اللي ممكن نعملها فيها 

ممكن قصة 

ممكن كتاب نقرأه سوا أو للطفل

ممكن قرآن نحفظه 

ممكن أنشطة التقويم .. الطقس .. 

ممكن أنشطة توضيح روتين اليوم

ممكن أنشطة المهارات علي اختلافها 

ممكن درس رياضيات او علوم او أي مادة تانية 

مفيش محتوي محدد للسلة لأن كل أسرة بتنظمها وفق منهجها وجدولها 

..

أنا جربت أستعمل الفكرة دي مع بداية السنة بتاعتنا  من بعد رمضان وحقيقي قرقت كتير جدا 

ساعدتني أعمل روتين صباحي لينا .. بقي سهل علينا ندخل جو المدرسة بتاعتنا بمجرد ما نقعد علي طرابيزتنا ونتصفح السلة 

ساعدتني علي " أدومه وإن قل " 

لأني خصصت السلة للمادة الأساسية اللي محتاجين نتعلم كأولولية خلال يومنا .. وعلي الأرفف التانية بقيت أحضر الأنشطة أو المواد الفرعية

ولأننا بنبدأ بالسلة بعد فطار بنتي مباشرة وفي بداية اليوم

فبقينا بننجز أهم حاجة في يومنا التعليمي مبكرا وأولا 

باقي اليوم بقي مش مهم كملت معاها خطتنا أو أنشطة الأرفف ولا لأ 

لأن الأهم اتنفذ بالفعل خلاص

ساعدتني علي تحقيق الاهتمام بالقرآن 

الأنشطة اللي في السلة بتجذب بنتي ومع إصراري إننا نقوم بالحفظ أولا وبعدين نلعب بالأنشطة أو نحكي القصة بفضل الله بقي ده نظام ثابت عندنا وبقت تحب تقوم بالحفظ أولا عشان تلعب بمحتوي السلة ( وبرفق باستعجالها أحيانا فممكن اكتفي بقراءة مرة أو مرتين للسورة نظرا لصغر سنها) 

..

بالنسبة لمحتوي سلتنا الصباحية أنا ركزت فيه علي ٣ حاجات أساسية 

حفظ القرآن 

أنشطتنا للغة العربية (ودي تحتها أنشطة كتير أوي مش مجرد تعلم الحروف بس ) 

نص مسموع بالفصحي 

اكتفيت بدول وحبيت أبسط الدنيا علي نفسي عشان أقدر أحقق الفايدة من وراء السلة 

في معلمين منزليا بينوعوا المحتوي أكتر من كده بكتير 

ولك إنك تنوعي أو تخصصيها للمواد والأنشطة المناسبة ليكم

في الصور شكل سلتنا ونموذج ليوم من إنشطتنا من خلالها 

واللي عايز يشوف صور أكتر أو يقرأ عنها أكتر 

ممكن يستعمل جوجل في البحث عن 

Morning  homeschool basket  

#تعليم_منزلي #حفظ_القرآن #السلة_الصباحية